03.03.2017
Bidh na ceudan de bhoireannaich à Alba gu lèir a’ tighinn còmhla gus Latha Eadar-nàiseanta nam Boireannach a chomharrachadh aig Pàrlamaid na h-Alba an deireadh seachdain seo tighinn.
Is e cuspair an tachartais am-bliadhna ‘Cumhachd do Bhoireannaich’ agus bidh caochladh luchd-labhairt ann, nam measg am Prìomh Mhinistear, am Fìor Urr Nicola Sturgeon BPA, Roza Salih Ghlaschu, Agnes Tolmie Cathraiche Còmhdhail Boireannaich na h-Alba, Veronica Fernandez Mendez bho Aonadh Cruinneil UNI, am Fìor Urr Dr. Lorna Hood, a bha na Modaratair air Eaglais na h-Alba agus an tè-àbhachdais Susan Morrison. Bidh an tachartas seo le Còmhdhail Boireannaich na h-Alba, a tha air a bhith a’ ruith fad dà bhliadhna deug a-nis, a’ comharrachadh euchdan eaconomach, poilitigeach agus sòisealta nam boireannach san àm a dh’fhalbh agus san àm air thoiseach. Bidh Ceistean is Freagairtean ann san t-seòmar-dheasbaid cuideachd.
Thuirt Leas-Oifigear Riaghlaidh Linda Fabiani BPA, a bhios sa chathair aig an tachartas:
“Tha e na urram dhuinn a bhith a’ cur fàilte air cha mhòr 400 de bhoireannaich bho chaochladh àiteachan gu Pàrlamaid na h-Alba air Latha Eadar-nàiseanta nam Boireannach.
“Chan e a-mhàin gu bheil an tachartas aig Pàrlamaid na h-Alba na chothrom gus sgeulachdan bhoireannach misneachail a sgaoileadh, tha a na chothrom cudromach gus dùbhlan a thoirt air neo-ionannachd cuideachd.
"Air feadh an t-saoghail, tha barrachd is barrachd bhoireannach na riamh a’ dèanamh cho-dhùnaidhean ach tha barrachd rì dhèanamh fhathast. Is e sin as coireach gu bheil tachartasan mar seo deatamach gus atharrachadh math a thoirt agus cumhachd a thoirt do bhoireannaich an dà chuid ann an Alba agus air feadh an t-saoghail.”
Thuirt Cathraiche Còmhdhail Boireannaich na h-Alba, Agnes Tolmie:
“Chan fhaodar aghaidh a chur air ceistean a thig air boireannaich gach latha nas lugha na bhios luchd-poileasaidh agus – co-dhùnaidhean ag èisteachd agus a’ gabhail ghnìomhan air beachdan, fiosrachadh agus smuaintean bhoireannach.
“Bidh a’ Chòmhdhail a’ cur thachartasan air bhonn air feadh Alba a bheir boireannaich còmhla gus ceistean mar chùram-chloinne, cosnadh, slàinte is còmhdhail a dheasbad.
“Feumaidh boireannaich cluas-ri-claisneachd fhaighinn agus atharrachadh fhaicinn anns na coimhearsnachdan aca. Aitnichidh is comharraichidh an tachartas seo nas urrainn do bhoireannaich a dhèanamh ag obair còmhla.”
Cùl-fhiosrachadh
Tha Latha
Eadar-nàiseanta nam Boireannach air a bhith ga chumail bho thoiseach nan 1900an
agus tha e ga chomharrachadh air feadh an t-saoghail air 8 Màrt. Tha Riaghaltas
na h-Alba air tachartas a chumail gus Latha Eadar-nàiseanta nam Boireannach a
chomharrachadh a h-uile bliadhna bho 2005.