24.03.2017
Thig Glaschu fon
phrosbaig le Comataidh Tèarainteachd Shòisealta ann am Pàrlamaid na h-Alba, agus a’ iad a’ tòiseachadh a
cuid sgrùdaidh air molaidhean a tha ag amas air dèiligeadh ri bochdainn
cloinne.
Bidh coinneamh fhoirmeil
aig a’ Chomataidh air Diluain 27 Màrt aig 2f ann an Seòmraichean Baile Ghlaschu,
far am bi iad a’ cluinntinn bho luchd-fianais, nam measg Naomi Eisenstadt,
comhairliche neo-eisimeileach aig Riaghaltas na h-Alba air bochdainn agus
neo-ionannachd, agus Jim McCormick, bho Urras Joseph Rowntree, air dè a’
bhuaidh a tha aig bochdainn cloinne agus dè an diofar a nì am bile ùr.
Air a thoirt a-steach
anns a’ Ghearran, bidh Bile Bochdainn Cloinne (Alba) a’ cur an gnìomh ullachaidhean far am bi riatanas
air Riaghaltas na h-Alba a bhith a’ coileanadh targaidean àraidh airson
bochdainn cloinne a lùghdachadh. Nam measg, feumaidh nas lugha na 10 sa cheud
de chlann a bhith ann am bochdainn ann an comas ri càch agus nas lugha na 5 sa
cheud de chlann ann am bochdainn iomlan ro 2030.
An dèidh na coinneimh,
bidh a’ Chomataidh a’ coinneachadh ri riochdairean fiathaichte—nam measg,
leighichean agus luchd-foghlaim a tha ag obair ann an Glaschu agus a’ strì an
aghaidh bochdainn cloinne—ann an seisean neo-fhoirmeil gus na beachdan aca
fhaighinn air a’ Bhile.
A’ bruidhinn ron
choinneimh, thuirt Neach-gairm na Comataidh, Sandra White BPA:
“Do phàiste a’ fàs suas
ann am bochdainn, faodaidh na h-èifeachdan a bhith a’ mairsinn fad am beatha.
Tha buaidh air slàinte agus foghlam fada an dèidh don phàiste fàs suas. Is ann
air an adhbhar sin a tha sinn uile ag aontachadh nach eil àite sam bith ann an
Alba airson bochdainn cloinne.
Anns na coinneamhan
againn ann an Glaschu, bidh cothrom againn a chluinntinn bhuapasan a tha ag
obair a dhèiligeadh ri bochdainn cloinne air feadh na h-Alba. Bidh a’
choinneamh neo-fhoirmeil againn cuideachd a’ leigeil leinn bruidhinn riuthasan
a tha ag obair ‘air an làr’ ann an Glaschu agus cluinntinn mu dheidhinn nan
nithean a tha iadsan a’ faicinn anns an obair aca le clann air a bheil buaidh
bho bhochdainn. Bidh sinn ag iarraidh fios a bhith againnn air dè thathar a’
dèanamh gus a’ chùis a chur ceart agus dè a’ bhuaidh dha-rìribh a bhios aig a’
Bhile air a’ chùis.”
Gheibhear tiogaidean
airson coinneamh foirmeil na Comataidh AN-ASGAIDH, ach feumaidh daoine an
ainmean a chlàradh ro-làimh. Bu chòir dhaibhsan a tha ag iarraidh a bhith an
làthair fòn a chur gu 0131 348 5200.