Fàilte air a cur air barrachd chumhachdan gus aghaidh a thoirt air mì-ghnàthachadh nam bràistean-gorma

07.05.2014

Tha ceuman aig a bheil mar amas comas nan ùghdarrasan ionadail gus aghaidh a thoirt air mì-ghnàthachadh sgeama-pàircidh nam bràistean-gorma do dhaoine ciorramach a neartachadh air fàilte fhaighinn an-diugh bho Chomataidh Riaghaltas Ionadail is Ath-Bheothachadh aig Pàrlamaid na h-Alba.

Mar chuid de Bhile Bràistean-gorma do Dhaoine Ciorramach (Alba), am measg nan ceuman tha comas do dh’ùghdarrasan ionadail bràistean a thoirt air falbh ann an suidheachaidhean sònraichte de mhì-ghnàthachadh. Tha am Bile cuideachd air eucoir a dhèanamh de bhràistean-gorm a chaidh a dhubhadh a-mach a thaisbeanadh.

Thuirt Neach-gairm na Comataidh, Caoimhin Stiùbhart BPA:

“Tha sgeama-pàircidh nam bràistean-gorma na ghoireas deatamach do dhaoine air feadh na dùthcha. Bidh e a’ cuideachadh gus tomhas de neo-eisimeileachd agus de chàileachd-beatha nach biodh aig daoine às aonais an sgeama.

“Tha bagairt air an neo-eisimeileachd seo, ge-tà, le mì-ghnàthachadh nam bràistean -gorma. Is e sin as coireach gu bheil a’ Chomataidh againn a’ cur fàilte air na ceuman ùra cruaidhe seo. Chan eil mì-ghnàthachadh nam bràistean-gorma na eucoir gun fhuilingiche (victim-less) agus cuidichidh am Bile seo gus àiteachan a thoirt don fheadhainn as motha aig a bheil feum orra.”

Ri linn na fianais, chuala a’ Chomataidh bho ùghdarrasan ionadail, Poileas na h-Alba, Comann-lagha na h-Alba agus bho bhuidhnean a’ riochdachadh luchd-cleachdaidh nam bràistean-gorma. Chuala a’ Chomataidh gu bheil an sgeama ga chleachdadh gu farsainn le daoine air a bheil ciorram a chur gus cothrom fhaighinn air obraichean, bùithtean agus seirbheisean-coimhearsnachd agus tha aon ùghdarras ionadail a’ dèanamh a-mach gu bheil co-dhiù fichead a-mach às a’ cheud de na h-àiteachan-pàircidh aige ga chleachdadh le sealbhadairean nam bràistean-gorma.

Cùl-fhiosrachadh

Chaidh Bile Bràistean-gorma do Dhaoine Ciorramach (Alba) a thoirt a-steach anns an Dùbhlachd 2013 le Dennis Robastan BPA.

Thathar air mu 263,000 de bhràistean-gorma a thoirt a-mach ann an Alba, a bheir lasachadh air pàirceadh gus a chur air chomas do shealbhadairean nam bràistean  pàirceadh gun chìs is gun chrìoch-ùine air loidhnichean-buidhe eadar shingilte is dhùbailte ann an suidheachaidhean sònraichte.  

Ann am fianais don Chomataidh anns a’ Mhàrt 2014, rinn Comhairle Cathair Ghlaschu gun robh mu fhichead a-mach às a’ cheud de na h-àiteachan-pàircidh aige ga chleachdadh le sealbhadairean nam bràistean-gorma.