Clann-sgoile na h-Alba a’ farpais airson Euroquiz 2014

Freagraidh 31 de sgiobaidhean uile-gu-lèir a’ riochdachadh bun-sgoiltean bho Shealtainn a-nuas gu Crìochan na h-Alba raon farsaing cheistean air a h-uile rud bho phoilitigs Eòrpach is cruinn-eòlas gu cultar, spòrs agus eachdraidh anns an oidhirp gus duais Euroquiz a ghleidheadh.  

Thuirt Leas-oifigear Riaghlaidh agus fear-nan-ceist Euroquiz Iain Scott BPA: 

“Tha mi cho riaraichte gu bheil Pàrlamaid na h-Alba a’ cumail cuairt dheireannach an tachartais seo agus tha mi a’ cur meal-an-naidheachd air a’ chlann-sgoile gu lèir airson an gnothach a dhèanamh don chuairt mu dheireadh agus air na rinn iad de dh’obair gus a bhith an seo an-diugh.   

“A h-uile bliadhna, bidh clann-sgoile na h-Alba a’ cur nàire air mòran leis an eòlas a tha aca air an àite a tha againn san t-saoghal agus e a’ fàs cruinneil agus ioma-chultarail fad na tìde. Le taghaidhean na h-Eòrpa gan cumail air 22 Cèitean, is e seo àm inntinneach dhuinn uile gus measadh a dhèanamh air na tha againn de dh’eòlas air an Roinn Eòrpa.”  

Tha Urras Foghlam Eòrpach na h-Alba air a bhith a’ cumail farpais nan ceist bho 1993 agus is e seo an seachdamh bliadhna a thathar air an tachartas a chumail aig Pàrlamaid na h-Alba. Tha urras ga chumail air an tachartas le Pàrlamaid na h-Eòrpa agus Riaghaltas na h-Alba.  

Thuirt Ministear an Fhoghlaim, Alasdair Allan BPA:  

“Bu mhath leam meal-an-naidheachd a chur air na sgiobaidhean a tha air a’ chuairt dheireannach nàiseanta de Euroquiz 2014 a ruigsinn. Tha an fharpais seo mar chothrom dha-rìribh do dhaoine òga barrachd ionnsachadh mu Eòrpa agus mun eachdraidh is mun chultar agus mu na cànanan na lùib agus tha mi cho riaraichte a bhith a’ faicinn sgiobaidhean bho gach càrn de dh’Alba an sàs.” 

Tha a h-uile gin de na 31 sgoiltean Albannach an sàs air a’ chuairt ùghdarrais ionadail aca fhèin a ghleidheadh agus bidh iad ann am farpais ris an fheadhainn a bhuannaich na cuairtean ionadail eile sa chuairt mu dheireadh.  

Thèid an tachartas a chraoladh beò air an Lìon, air am bi cothrom tro làrach-lìn Pàrlamaid na h-Alba aig - http://www.scottishparliament.tv/ 

Cùl-fhiosrachadh 

Bidh dealbhan den tachartas rim faotainn bho dhealbhadair oifigeil Pàrlamaid na h-Alba Anndra Cowan ris am faodar conaltradh a dhèanamh air 0131 348 5878 no air post-dealain aig [email protected]. 

Is iad na 31 bun-sgoiltean Albannach an sàs ann an Euroquiz 2014:

• An Eaglais Bhreac – Bun-sgoil Bhantaskin
• Cathair Obar Dheathain – Bun-sgoil Chaitligeach an Naoimh Peadar
• Crìochan na h-Alba – Bun-sgoil a’ Mhaoil-Rois
• Dùn Deagh – Bun-sgoil Bharnhill
• Dùn Èideann – Bun-sgoil Bhruntsfield
• Dùn Phris agus Gall-ghàidhealaibh – Bun-sgoil Newington
• Earra Ghàidheal agus Eilean Bhòid – Bun-sgoil Hermitage
• Fìobha – Bun-sgoil Crossford
• Gàidhealtachd – Bun-sgoil a’ Chrùin (Inbhir Nis)
• Glaschu – Bun-sgoil na Croise Naoimhe
• Inbhir Chluaidh – Bun-sgoil an Naoimh Eòin
• Lodainn an Iar – Bun-sgoil an Naoimh Iòsaph (Gleann Iucha)
• Meadhan Lodainn – Bun-sgoil Bhonnyrigg
• Moireabh – Bun-sgoil Ghreenwards
• Na h-Eileanan Siar – Bun-sgoil Steòrnabhaigh
• Peairt agus Cinn Rois – Bun-sgoil Phort M’ Aodhaig
• Sealtainn – Bun-sgoil Tingwall
• Siorrachd Aonghais – Bun-sgoil Seaview
• Siorrachd Chlach Mhanainn – Bun-sgoil Mhenstrie
• Siorrachd Dhùn Breatainn an Ear – Bun-sgoil Bhaile Jaffray
• Siorrachd Dhùn Breatainn an Iar – Bun-sgoil Mhoire Dhùn Tòchair
• Siorrachd Inbhir Àir a Deas – Bun-sgoil Allmhaigh
• Siorrachd Inbhir Àir a Tuath – Bun-sgoil Mhoire (An Leargaidh Ghallta)
• Siorrachd Inbhir Àir an Ear – Bun-sgoil Chille Mhàra
• Siorrachd Lannraig a Deas – Bun-sgoil an Naoimh Leonard
• Siorrachd Lannraig a Tuath – Bun-sgoil Knowetop (Tobar na Màthar)
• Siorrachd Lodainn an Ear – Bun-sgoil Dhùn Barra
• Siorrachd Obar Dheathain – Bun-sgoil Chnoc a’ Bhaile Ùir
• Siorrachd Rinn Friù – Bun-sgoil Ualais
• Siorrachd Rinn Friù an Ear – Bun-sgoil Ghiffnock
• Sruighlea – Bun-sgoil Ailein

B’ e Bun-sgoil Cradlehall  ann an Inverness a bhuannaich Euroquiz an-uiridh, le Bun-sgoil an Naoimh Leonard san dara h-àite agus Bun-sgoil nan Ceallan ann an Siorrachd Obar Dheathain san treas àite.  

Faodaidh daoine a tha ag iarraidh a bhith an làthair aig na ceistean sealltainn bho ghailearaidh nam meadhanan ann an Seòmar-deasbaid na Pàrlamaid.  

Is e a tha ann an Urras Foghlam Eòrpach na h-Alba carthannas clàraichte a chaidh a stèidheachadh ann an 1993 aig a bheil e mar amas foghlam mun Roinn Eòrpa a chur air adhart agus a bhrosnachadh aig sgoiltean, colaistean agus oilthighean air feadh na h-Alba.