29.01.2017
Feumaidh Ministear Brexit Riaghaltas na Rìoghachd Aonaichte, David Davis BP, nochdadh air beulaibh Comataidh Eòrpach Thaigh an Ròid mus tòisich barganachadh mu tharraing às Aonadh na h-Eòrpa, tha neach-gairm na comataidh, Seonag NicAilpein BPA ag ràdh.
Tha a’ ghairm a’ tighinn an dèidh dà chuireadh fhoirmeil
gu Mgr Davis san Iuchar agus san Dùbhlachd 2016, nuair a thuirt an oifis aige
gun robh e ro thrang a nochdadh aig Pàrlamaid na h-Alba.
Agus i a’ sgrìobhadh gu Rùnaire na Stàite airson Aonadh
na h-Eòrpa Fhàgail, a chaidh fhoillseachadh an-diugh, tha litir an neach-ghairm a’
dèanamh soilleir:
- “tha
daoine, gnìomhachasan agus buidhnean air feadh na h-Alba air iomagain mhòr
[mu Bhrexit] a chur an cèill”
- tha
a’ Chomataidh den bheachd gu bheil e deatamach gun cluinn i bho bhall aig
ìre àrd de Riaghaltas na h-Alba gus cuideam a chur air an iomadh dragh a
tha aig muinntir na h-Alba agus soilleireachadh fhaighinn mu àite
Riaghaltas na Rìoghachd Aonaichte a thaobh na h-Alba, agus
- gu
bheil a’ chomataidh “fhathast den bheachd gun fheum i coinneachadh ribh
[Mgr Davis], mar am Ministear aig an ìre as àirde san RA airson tarraing
na RA as an AE, mus tòisich am barganachadh.”
Is e teacsa làn litir Ms NicAilpein air 27 Faoilleach gu
Rùnaire na Stàite mar a leanas:
“Tha mi a’ sgrìobhadh thugaibh mar Neach-gairm Chomataidh
Cultair, Turasachd is Cheanglaichean A-muigh, an dèidh na litrichean agam air
19 Iuchar agus 2 Dùbhlachd far an do tug mi cuireadh dhuibh fianais a thoirt don
Chomataidh.
Tha e na bhriseadh-dùil mòr dhomh nach d’fhuair sinn
freagairt fhoirmeil do na litrichean seo. A dh’aindeoin dearbhaidh ann an
labhairt bho na h-oifigearan agaibh agus bho Mhgr Mundell gum biodh sibh
deònach nochdadh air beulaibh na Comataidh, tha na h-oifigearan ud air fios a
leigeil gu bheil sibh tuilleadh is trang agus air moladh gun nochd Rùnaire na
Stàite, David Jones BP, nur n-àite.
Ged a bhiodh a’ Chomataidh toilichte cluinntinn bho Mhgr
Jones, tha i fhathast den bheachd gun fheum i coinneachadh ribh fhèin, mar am
Ministear as àirde ìre san RA mu tharraing na RA bhon AE, mus tòisich am
barganachadh. Cuideachd, choinnich mi ri Rùnaire na Stàite airson na h-Alba air
26 Faoilleach 2016 agus dhearbhaich e dhomh gum biodh e nur comas fianais a
thoirt don Chomataidh.
Tha an obair a tha a’ dol air adhart aig a’ Chomataidh
air cuideam a chur air farsaingeachd de dh’iomagain mhòr a chuir daoine,
gnìomhachas agus buidhnean air feadh Alba an cèill. An dèidh fianais a ghabhail
bho Phrìomh Mhinistear agus bho Mhinistear Barganachadh na RA mu Àite na h-Alba
san Roinn Eòrpa, tha a’ Chomataidh den bheachd gu bheil e deatamach gun cluinn
i cuideachd bho bhall aig ìre àrd de Riaghaltas na RA gus cuideam a chur air an
iomadh dragh a tha air muinntir na h-Alba agus beagan soilleireachaidh
fhaighinn air àite Riaghaltas na RA a thaobh na h-Alba.
Nam b’ e gum biodh e na chuideachadh fianais a thoirt tro
cho-labhairt bhideo seach a bhith a’ nochdadh aig Pàrlamaid na h-Alba, bhiodh
a’ Chomataidh leagte ri seo. Tha mi ag iarraidh mar sin gun dèan an oifis
agaibh conaltradh ri clàrcan na Comataidh cho luath is a ghabhas gus
ceann-latha freagarrach a chur air dòigh.”
Agus e cuideachd a’ toirt seachad bheachd, thuirt Leòdhas
Dòmhnallach BPA, Leas-neach-gairm:
“Feumaidh fios a bhith aig daoine agus aig buidhnean ann
an Alba mar a tha Brexit a’ dol a bhualadh orra agus tha e deatamach gun tig
Rùnaire na Stàite air beulaibh na comataidh againn gus an iomadh dragh a thog
daoine leinn ann am fianais a fhreagairt.”
Cùl-fhiosrachadh
Tha a’ Chomataidh air rannsachadh a
ghabhail os làimh mu bhuaidh reifreann an AE air Alba, a thòisich gu goirid an
dèidh an reifrinn san Ògmhios 2016.
Dh’fhoillsich a’
Chomataidh aithisg, Brexit: Beachd na
h-Alba: giorrachadh air ceistean agus ceistean ag èirigh Dihaoine 20
Faoilleach, a’ toirt seachad nam beachdan agus nan ceist mu Bhrexit aig
barrachd is 150 de bhuidhnean agus daoine ann an Alba.