08.04.2020
Bidh a’ chiad Àm Cheistean
Bhiortail a’
tachairt a-màireach, Diardaoin 9 Giblean, aig 12:30, le rèiteachaidhean air an innse
ann an teachdaireachd a thèid a chur chun a h-uile BPA bho Oifigear Riaghlaidh
Pàrlamaid na h-Alba, am Fìor Urr Ken Mac an Tòisich BPA, an-diugh.
Chaidh an seisean a chur
air dòigh mar fhreagairt ri suidheachadh Corònabhìoras Covid-19 nach fhacas
riamh roimhe. Gheibhear teacsa iomlan na litreach gu h-ìosal: a’ toirt a-steach
mar a chithear e air-loidhne:
A cho-obraichean còire
A bharrachd air a’ phost-d
agam na bu thràithe an-diugh, tha mi a-nis toilichte rèiteachadh a dhearbhadh
airson a’ chiad Àm Cheistean Bhiortail Cheannardan
aig Pàrlamaid na h-Alba, far am faigh ceannardan pàrtaidh cothrom ceist a chur
air a’ Phrìomh Mhinistear mu fhreagairt leantainneach Riaghaltas na h-Alba ri
tinneas Covid-19. Tha fios agam gu bheil Buill ag aontachadh gu bheil e nas
cudromaiche na bha e a-riamh gum bi a’ phàrlamaid againn ag obair tron èiginn
slàinte phoblaich seo agus gum bi sinn a’ cruthachadh chothroman gus sin a
dhèanamh air astar, gu h-àraidh gus nach cuir sinn daoine eile ann an cus cunnairt.
Tha mi airson taing a thoirt do stiùirichean pàrtaidh, manaidsearan
gnìomhachais agus oifigearan pàrlamaid airson a bhith ag obair cho luath agus
cho èifeachdach gus an seisean sgrùdaidh cudromach seo a chumail a-màireach.
Thathar an dùil gun
tòisich an seisean, a bhios mise a’ stiùireadh, aig 12.30f a-màireach le
aithris fosglaidh ghoirid leis a’ Phrìomh Mhinistear air na leasachaidhean as
ùire, mus fosgail e do cheistean bho ceannardan phàrtaidhean dùbhlanach:
Jackson Carlaw, Richard Leonard, Patrick Harvie, agus Willie Rennie. Tha sinn
an dùil gum mair an t-àm cheistean suas ri 25 mionaidean, agus thèid a
ghearradh dheth aig 30 mionaid. Tha sinn
air rèiteachaidhean a chur an sàs airson gum faigh buill eile, luchd-obrach,
agus muinntir a’ phobaill cothrom fhaicinn beò air TBh Pàrlamaid na h-Alba aig a’
cheangal a leanas:
https://www.scottishparliament.tv/channel/virtual-meeting Tha sinn cuideachd a’ tuigsinn gun tèid an seisean
cheistean a chraoladh beò leis a’ BhBC agus is dòcha craoladairean eile.
Leanaidh Biùro na
Pàrlamaid a’ toirt sùil air leasachaidhean leantainneach agus, ag ionnsachadh
bho agus a’ togail air na thachras a-màireach, beachdaichidh iad am bu chòir
tuilleadh ullachaidhean sgrùdaidh bhiortail a chur
an sàs le Buill eile airson an ath sheachdain. Tha mi glè mhothachail gum biodh
mòran Bhall a’ cur fàilte air a leithid de chothrom agus cumaidh mi fios thugaibh
mu cho-dhùnaidhean a’ Bhiùro, na h-ath cheumannan agus planaichean san àm ri
teachd.
Tapadh leibh airson na tha
sibh a’ dèanamh às leth an fheadhainn a tha sibh a’ riochdachadh aig an àm dhuilich
seo.
Gach dùrachd,
Ken
Am Fìor Urr Ken Mac an
Tòisich BPA
Oifigear Riaghlaidh